Непостижимым промыслом ко благу вечному мир уготовляяй, человеком времена и образ кончины определивый, остави, Господи, от века умершим вся согрешения их, приими я во обители света и радования, объятия Отчи отверсти им потщися и услыши ны, память их совершающия и поющия: Господи, Любы Неизреченная, помяни усопшия рабы Твоя.

Адама падшаго и весь род человеческий от вечныя погибели спасаяй, послал еси, Блаже, в мир Сына Твоего, Крестом бо и воскресением Его возсия и нам живот вечнующий. На безмерное Твое милосердие уповающе, чаем нетленнаго Царствия Славы Твоея, усопшим даровати того просим и молим Ти ся:
Возвесели, Господи, души, житейскими бури истомленныя, да скорби и воздыхания земныя забвению предадят.
Услыши я, Господи, на лоне Твоем, яко же мать чада своя, и реки им: прощаются вам греси ваша.
Приими я, Господи, в блаженное и тихое пристанище Твое, да возрадуются о божественней славе Твоей.
Господи, Любы Неизреченная, помяни усопшия рабы Твоя.

Рече некогда Исаак Сириянин: "Сердце милующее о людех и скотех и о твари всей молитвы слезныя ежечасно приносит, дабы сохранилися и очистилися". Такожде и мы дерзновенно всем от века умершим у Господа помощи просяще, взываем:
Ниспосли нам, Господи, дар молитвы, пламенеющей о умерших,
Помяни, Господи, вся заповедавшыя нам, недостойным, молитися о них, и изжени забвенныя ими грехи.
Помяни, Господи, вся без молитвы погребенныя, приими, Господи, в селения Твоя, вся от скорби или радости смертию напрасной скончавшыяся. Господи, Любы Неизреченная, помяни усопшия рабы Твоя.

Повинны есмы в бедствии мира, в страдании безсловесныя твари, в боолезнех и муках младенцев непорочных, грехопадением бо людей блаженство и лепота всея твари разрушься. О величайшаго от Страдальца невинных, Христе Боже наш! Ты Един еси отпустити всем можеши. Отпусти же всем и вся, миру первозданное благоденствие подаждь, мертвии и живии да обрящут, взывая: Аллилуиа.

Свете тихий, Искупителю всея вселенныя, любовию мир весь объемляй: се слышится со креста вопль Твой о вразех Твоих: "Отче, отпусти им!" Именем всепрощения Твоего молитися Отцу Небесному о упокоении вечнем Твоих и наших враг дерзаем:
Прости, Господи, кровь неповинную пролившия, житейский путь наш скорбьми усеявшыя, благоденствие свое слезами ближних своих устрояющия.
Не осуди, Господи, гонящия ны клеветою и злобою, милостию воздаждь, ихже обидехом или оскорбихом по неведению, и да будет свята молитва наша о них таинством примирения.
Господи, Любы Неизреченная, помяни усопшия рабы Твоя.

Спаси, Господи, в тяжких мучениях скончавшияся, убиенныя, живыми погребенныя, землею засыпанныя, волнами и огнем поглощенныя, зверьми растерзанныя, от глада, мраза, бури или падения с высоты умершия, и радость Твою вечную подаждь им за скорбь кончины. Да благословят страданий своих время, яко искупления день, воспевав: Аллилуиа.

Всем, иже поёмлеми суть могилой во светлой юности, иже на земли терновый венец страданий прияша, иже радости земныя не узрёша, щедротами Твоея безконечныя любве воздаждь, Господи.
Под тяжким бременем трудов умершим воздаяние подаждь.
Приими, Господи, в чертози рая отроцы и девы и сподоби я ликовствования на вечери Сына Твоего.
Утиши, Господи, скорбь родителей о чадех умерших.
Упокой, Господи, вся рода и семени не имущия, о нихже несть кому молитву вознести Тебе, Создателю, да исчезнут греси их от блистания всепрощения Твоего.
Господи, Любы Неизреченная, помяни усопшия рабы Твоя.

Яко последнее ко вразумлению и покаянию знамение смерть даровал еси, Господи. При грозном блистании ея суета земная обнажается, страсти плотския и страдания утихают, не-покоривый разум смиряется. Правда вечная отверзается, отягченныя же грехми и безбожницы на смертнем одре бытие Твое вечное исповедуют и к милосердию Твоему взывают: Аллилуиа.

Отче утешения всяческаго, солнцем озаряеши, плодами услаждаеши, лепотою мира друзи и врази Твоя веселиши.
Веруем бо, яко и за гробом милосердие Твое, даже всеми отверженныя грешницы милующее, не истощаевается,
Скорбим об ожесточенных и беззаконных хулителех Святыни Твоея.
Буди, Господи, над ними спасающая благая воля Твоя.
Остави, Господи, без покаяния скончавшимся, спаси в омрачении ума сами себе погубившия, да угаснет пламень греховности их в море благодати Твоея.
Господи, Любы Неизреченная, помяни усопшия рабы Твоя.

Страшен есть мрак души, от Бога удаленной, совести терзания, скрежет зубный, огнь неугасимый и червь неумирающий. Трепещу таковыя участи и, якоже о самем себе, молюся о во аде страждущих. Да снидет на ня росою прохлаждения наша песнь: Аллилуиа.

Возсия свет Твой, Христе Боже наш, на седящия во тьме и сени смертней и во аде сущия, Тебе взывати не могущия.
В преисподняя земли снисшед, изведи, Господи, во отраду грехми с Тобою разлученныя, но не отрекшияся от Тебе чада Твоя, страждут бо люте, помилуй я.
Согрешиша бо на небо и пред Тобою, безмерно тяжки грехи их, милость же Твоя безмерна есть
Посети горькую нищету душ от Тебе отдаленных, помилуй, Господи, истину по неведению гнавшия, буди им любовь Твоя не огнем палящим, но райскою прохладою.
Господи, Любы Неизреченная, помяни усопшия рабы Твоя.

Помощь подати десницею Своею тщашеся усопшим рабом Своим, явися им, Господи, в видениих таинственных, ясновидно, на молитву их вдохновляя, да поминая отшедшия, благая дела и подвизи за ня творят, взывая: Аллилуиа.

Церковь Христова вселенская непрестанно ежечасно молитвы за почившия по всей земли возносит, грехи бо мира Пречистою Кровию Божественнаго венца смываются, от смерти к животу и от земли к небеси души усопших силою молитв за ня пред олтари Божии.
Буди, Господи, ходатайство Церкви умершим лествицею к небеси.
Помилуй я, Господи, предстательством Пресвятыя Богородицы и всех святых.
Остави им согрешения, верных Твоих ради, день и ночь к Тебе вопиющих.
Незлобивых ради младенцев помилуй, Господи, родителей их, и матерей слезами искупи согрешения чад их.
За молитвы безвинных страдалец, за кровь мученик пощади и помилуй грешницы.
Приими, Господи, молитвы наша и милостыни, яко воспоминание добродетелей их.
Господи, Любы Неизреченная, помяни усопшия рабы Твоя.

Мир весь общая могила священная есть, на всяком бо месте прах отец и братий наших. Единый неизменно возлюбивый ны, Христе Боже наш, прости вся, еже от начала и до ныне умершия, да воспоют любовию безмерною: Аллилуиа.

Грядет быти день, яко пещь горящая, день велий и страшный Суда последняго, тайны человеческия открыются, книги совестныя разгнутся... "Примиритеся с Богом! - вопиет апостол Павел, - Примиритеся прежде того страшнаго дне". Помози нам, Господи, слезами живых недостающее умерших восполнити.
Да будет им, Господи, звук трубы ангельской спасения благовестием и в час Суда Твоего радостнаго помилования их сподоби.
Увенчай, Господи, славою за Тя пострадавшая и покрый благостию Твоею прегрешения немощных.
Господи, вся по имени ведый, помяни во иночестем чине спасавшияся, помяни благословенныя пастыри со чада их.
Господи, Любы Неизреченная, помяни усопшия рабы Твоя.

Благословите скоротекущее время. Каждый бо час, мгновение каждое к вечности приближает. Новая скорбь, седина новая суть вестницы мира грядущаго, свидетелие тленности земныя, яко вся мимотечет возвещают, яко Царство вечное приближися, идеже несть ни слез, ни воздыхания, но отрадная пения: Аллилуиа.

Яко древо по времени листвий своих лишается, тако и дние наши по коликих летех оскудевают. Увядает и юности празднество, светильник радования угасает, близится старости отчуждение. Друзи и сродницы умирают. Где вы, юныя ликующия? Безмолвны гробы их, но души их в деснице Твоей. Мыслим взоры их из мира невещественнаго.
Господи, Ты еси Солнце пресветлое, озари и согрей усопших селения.
Да прейдет навеки горькаго разлучения время.
Сподоби ны радостнаго свидания на небесех.
Сотвори, Господи, да вси едино будем с Тобою. Возврати, Господи, отшедшим детства чистоту и юности благодушие, и праздником Пасхи да будет им живот вечный.
Господи, Любы Неизреченная, помяни усопшия рабы Твоя.

Проливая тихия слезы на могилах сродников наших, молимся с надеждою, и с упованием взываем: Скажи нам, Господи, яко оставил еси грехи их! Даждь о сем откровение таинственное духу, нашему, да воспеваем: Аллилуиа.

Весь путь прешедшия жизни нашел вижу озирался, колико множество людей, от перваго дне и до ныне отшедшия, и мнози их благая ми содеявшия. Любовию своею должная сим воздавая, вопию Ти:
Сподоби, Господи, славы небесныя родители моя и ближняя моя, над ложем моим младенческим бодрствовавшия, возрастившия и воспитавшия мя.
Прослави, Господи, пред Ангелы святыми, всех благовествовавших ми слово спасения, добру и правде, святым примером жизни своея учившия мя.
Услади, Господи, тех, иже во дни скорби моея манною сокровенною послужиша ми.
Вся добродетели и благодетели вознагради и спаси.
Господи, Любы Неизреченная, помяни усопшия рабы Твоя.

Где ты, смерте жало, где же и мрак и страх твой прежде бывающий? Отныне ты желанная, неразлучно с Богом сочетавши. Покою великий, субботства таинственнаго. Желание имам умрети и со Христом быти, взывает апостол. Темже и мы, взирая на смерть, яко на стезю к вечней жизни, воззовем: Аллилуиа.

Воскреснут мертвии и возстанут сущии во гробех и возвеселятся живущие на земли, яко возстанут телеса духовныя, светло прославленныя, нетленныя. Кости сухия, слышите слово Господне: "Се Аз введу в вас дух живота и дам на вас жилы и возведу на вас плоть и простру по вам кожу". Возстаньте из древле прошедшаго времене, искупленнии Кровию Сына Божия, оживлени смертию Его, возсия бо на вы свет воскресения.
Отверзи им, Господи, ныне всю бездну совершенств Твоих.
Ты сиял еси им светом солнца и луны, да узрят они и славу лучезарных ликов ангельских.
Ты услаждал еси я великолепием востока и запада светил небесных, да узрят же они и свет невечерний Божества Твоего.
Господи, Любы Неизреченная, помяни усопшия рабы Твоя.

Плоть и кровь Царствия Божия не наследят, доколе во плоти живем, отлученнии от Христа. Аще же и умрем, но оживем для вечности. Подобает бо тленному телу нашему в нетление облекшись и мертвенному сему безсмертием просияти, дабы во свете невечерняго дне воспети: Аллилуиа.

Чаем сретения со Господем, чаем ясной зари воскресения, чаем пробуждения из гробов сродников наших и знаемых и оживления в благоговеннейшей лепоте жизни умерших. И грядущее преображение всея твари торжествуем и Возсоздателю нашему вопием:
Господи, к торжеству радости и доброте мир создавый, нас к святости из глубины греховныя возставивый, даждь умершим царствовати посреде бытия новаго, да возсияют яко светила на небеси в день славы их.
Да будет им Агнец Божественный светом невечерним.
Даждь, Господи, и нам с ними Пасху нетления праздновати.
Соедини умершия и живыя в нескончаемей радости.
Господи, Любы Неизреченная, помяни усопшия рабы Твоя. 

О Премилосердый Отче Безначальный, всем хотяй спастися, Сына к погибшим ниспославый и Духа Животворящаго изливаяй! Помилуй, прости и спаси родныя и близкия нам усопшия и всех от века скончавшихся и предстательством их посети нас, да вместе с ними вопием Тебе, Спасителю Богу, победную песнь: Аллилуиа.